សេចក្ដីថ្លែងការណ៍រួម ការបាញ់សម្លាប់ប្រជាពលរដ្ឋដោយ កងកំលាំងសមត្ថកិច្ចចំរុះរាជធានីភ្នំពេញ

      ភ្នំពេញ ថ្ងៃទី១៦ ខែកញ្ញា  ឆ្នាំ២០១៣

          អង្គការសង្គមស៊ីវិល ដែលកំពុងបំពេញបេសកកម្ម ក្នុងការជំរុញអោយមានការការពារ និង​លើក​ស្ទួយសិទ្ធិមនុស្សនៅក្នុងប្រទេសកម្ពុជា ធ្វើការថ្កោលទោសយ៉ាងដាច់អហង្ការ ចំពោះការ​បាញ់​ប្រហារដោយ កងកំលាំង សមត្ថកិច្ចចំរុះរាជធានីភ្នំពេញ ទៅលើហ្វូងប្រជាពលរដ្ឋ ដែលគ្មាន​អាវុធ និងមធ្យោបាយការ ពារខ្លួន បណ្ដាលឲ្យបុរសម្នាក់ ស្លាប់នៅហ្នឹងកន្លែង និងរងរបួសធ្ងន់​ចំនួន ៨ នាក់ ព្រមទាំងមានការចាប់ខ្លួនមនុស្សមួយ ​ចំនួន​ ៦ ផងដែរ។

        កាលពីថ្ងៃទី១៥ ខែកញ្ញា ឆ្នាំ២០១៣ វេលាម៉ោងប្រមាណជា ៨:៣០ នាទី យប់ មានការប៉ះ​ទង្គិច​​រវាងប្រជាពលរដ្ឋ និង កងកំលាំងសមត្ថកិច្ចចំរុះរាជធានីភ្នំពេញ ស្ថិតនៅទីតាំងប្រមាណ ១០០ ម៉ែត្រ ពីស្ពានច្បារអំពៅ ដោយសារ តែកងកំលាំងមានសមត្ថកិច្ចចំរុះ​រាជធានីភ្នំពេញ បានធ្វើ​ការ​រារាំងយ៉ាង​តឹង​រឹង​ចំពោះការធ្វើដំណើរ របស់ប្រជាពលរដ្ឋ ចាប់តាំងពីម៉ោងប្រហែល ៥ ល្ងាចដែលជា ហេតុធ្វើ​អោយ​ប្រជាពលរដ្ឋដែលរស់នៅក្នុងតំបន់​ចាក់​អង្រែ ក្រុងតាខ្មៅ និង​តំបន់​ខាងកើត​ទន្លេបាសាក់ មិន​អាចធ្វើដំណើរទៅលំនៅដ្ឋានបាន​។ នៅវេលាម៉ោងប្រហែល ៨:៣០ នាទី យប់ ជនរងគ្រោះបានលើក​​រនាំង​បន្លា​លួសចេញដើម្បីបើកផ្លូវ ទើបកើតអំពើហិង្សា ដោយសមត្ថកិច្ច​បានបាញ់​ឧស្ម័នបង្ហូរទឹក​ភ្នែក បោកគ្រាប់​​បែកផ្សែង និង​បាញ់គ្រាប់ពិត​ ​សំដៅ​ទៅលើ​ហ្វូង​មនុស្ស ដែលកំពុងកកស្ទះ​ចរាចរណ៍​​​បណ្ដាល​ឲ្យ​បុរសម្នាក់ស្លាប់ និងរងរបួសធ្ងន់ចំនួន ៨ នាក់ ព្រមទាំងមាន​ការ​ចាប់ខ្លួន​មនុស្ស​ ​ចំនួន​ ៦ ផងដែរ។

  ការបាញ់បង្ក្រាបទៅលើហ្វូងជនស៊ីវិល គឺជាអំពើរំលោភសិទ្ធិមនុស្សធ្ងន់ធ្ងរ និងរំលោភច្បាប់​ព្រហ្មទណ្ឌរបស់ ប្រទេសកម្ពុជា ដែលមិនអាច​ទទួល​យកបាន។ ករណីឃាតកម្មនេះគឺជាការ​ទទួល​ខុសត្រូវរបស់រាជរដ្ឋាភិបាលកម្ពុជា។

      អង្គការសង្គមស៊ីវិល សូមអំពាវនាវអោយរាជរដ្ឋាភិបាលកម្ពុជា ធ្វើការស៊ើបអង្កេតឲ្យបាន​ត្រឹមត្រូវ និងដោយឯករាជ្យ ដើម្បីរកអោយឃើញអ្នកបញ្ជា និងជនដៃដល់ យកមកផ្ដន្ទារទោស​តាម​ច្បាប់​​ និងសូមដោះលែងប្រជាពលរដ្ឋ​​ ដែលបានចាប់​ខ្លួននៅក្នុង​ហេតុការណ៍​នេះ ឲ្យមានសេរីភាព​ឡើងវិញ។

ពត៌មានបន្ថែមសូមទំនាក់ទំនង

1.     លោក សុក សំអឿន ប្រធានសំរបសំរួលគណៈកម្មាធិការប្រព្រឹត្តិកម្ម(CHRAC)                                           និងជាប្រធាន CDP                                                          Tel: 012 901 199

2.     លោក នី ចរិយា ប្រធានផ្នែកស៊ើបអង្កេតសមាគមអាដហុក(ADHOC)             Tel: 011 274 959

3.     លោក គល់ បញ្ញា នាយកប្រតិបត្តិខុមហ្រ្វែល (COMFREL)                           Tel: 012 942 017

4.     លោក អាត់​ ធន់ ប្រធាន CLC                                                                        Tel: 012 998 906

5.     លោកយង់ គិមអេង ប្រធានមជ្ឈមណ្ឌល  PDP-Center                                  Tel: 016 828 211

6.      លោក សន ជ័យ តំណាង ANSA                                                                    Tel: 012 445 642

7.      លោក ហ៊ឹម យន់ អ្នកសម្របសម្រួល CISA                                                  Tel: 012 947 022

8.     លោក ពិន ធារិទ្ធិ     ប្រធានគ្រប់គ្រងរដ្ឋបាល EC                                       Tel: 0127 919 697

9.     លោក ហង្ស ពុទ្ធា     នាយកប្រតិបត្តិ និកហ្វិច(NICFEC)                                  Tel: 012 959 666

10.   លោក សួន ប៊ុនស័ក្ខិ លេខាធិកាដ្ឋានប្រតិបត្តិ CHRAC                                    Tel: 092 344 357