Original source from Damtnaut website
កាលពីថ្ងៃទី១២ខែកក្កដាឆ្នាំ២០១៣ម្សិលមិញនេះ តាមសំណើទូលថ្វាយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានឡាយព្រះហស្ដលេខានៅលើព្រះរាជក្រឹត្យលេខនស/ រកត/០៧១៣/៨២៧ ចុះថ្ងៃទី១២ ខែកក្កដាឆ្នាំ២០១៣ ត្រាស់បង្គាប់លើកលែទោសឱ្យទណ្ឌិតឈ្មោះ សម រង្ស៊ី ដែលត្រូវបានតុលាការសម្រេចផ្ដន្ទាទោសដាក់ពន្ធនាគារ តាមអំណាចសាលដីកាលេខ៣២ ចុះថ្ងៃទី០១ខែមីនាឆ្នាំ២០១១ របស់តុលាការកំពូល និងសាលដីកាស្ថាពរលេខ៨៤“ក្រIIIឃ” ចុះ ថ្ងៃទី២០ ខែកញ្ញា ឆ្នាំ២០១១ របស់ សាលាឧទ្ធរណ៍ ។
ព្រះរាជក្រឹត្យលើកលែងទោសឯកឧត្ដម សម រង្ស៊ី ប្រធានគណបក្សសង្គ្រោះជាតិលើកទី២នៅឆ្នាំ២០១៣នេះ បានយោងទៅលើព្រះរាជក្រមលេខនស/រកម/១២១១/ ០២១ចុះថ្ងៃទី២១ខែធ្នូឆ្នាំ២០១១ ដែលប្រកាសឱ្យប្រើច្បាប់ស្ដីពីពន្ធនាគារ ប៉ុន្ដែមិនបានយោងតាមក្រឹត្យលេខ២៨ក្រ ចុះថ្ងៃទី២០ខែមិថុនាឆ្នាំ១៩៨៨ ស្ដីពីការលើក លែងទោស និងបន្ធូរបន្ថយទោស ដែលនៅជាធរមានអនុវត្ដន៍នៅឡើយនោះទេ ពោលគឺមានទម្រង់ខុសពីព្រះរាជក្រឹត្យលើកលែងទោសឯកឧត្ដម សម រង្ស៊ី កាលពីលើកទី១នៅឆ្នាំ២០០៦ (ព្រះរាជក្រឹត្យលេខនស/រកត/០២០៦/០៦៨ ចុះថ្ងៃទី០៥ខែកុម្ភៈឆ្នាំ២០០៦) បានយោងទៅលើក្រឹត្យលេខ២៨ក្រ ចុះថ្ងៃទី២០ខែមិថុនាឆ្នាំ១៩៨៨ ស្ដីពីការលើកលែងទោសនិងបន្ធូរបន្ថយទោស ។
ក្រុមអ្នកតាមដានកិច្ចការច្បាប់នៅកម្ពុជា បានលើកឡើងថា កាលពីពេលថ្មីៗនេះ រាជរដ្ឋាភិបាលកម្ពុជាបានចេញសារាចរមួយលេខ០៣សរ ចុះថ្ងៃទី២៩ខែឧសភាឆ្នាំ២០១៣ ស្ដីពីការអនុវត្ដន៍គោលការណ៍ណែនាំអំពីនីតិវិធី និងវិធាននៃការតាក់តែងសេចក្ដីព្រាងច្បាប់ និងលិខិតបទដ្ឋានគតិយុត្ដផ្សេងទៀត ចុះហត្ថលេខាផ្ទាល់ដោយសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី ដោយបានដាក់ចេញនូវគំរូទម្រង់នៃ ព្រះរាជក្រឹត្យស្ដីពីការបន្ធូរបន្ថយទោស និងលើកលែងទោសតម្រូវឱ្យយោងតាមក្រឹត្យលេខ២៨ក្រ ចុះថ្ងៃទី២០ខែមិថុនាឆ្នាំ១៩៨៨ ស្ដីពីការលើកលែងទោសនិងបន្ធូរបន្ថយទោស ពោលគឺមិនបានតម្រូវឱ្យយោងតាមព្រះរាជក្រមលេខនស/រកម/១២១១/០២១ ចុះ ថ្ងៃទី២១ខែធ្នូឆ្នាំ២០១១ ដែលប្រកាសឱ្យប្រើច្បាប់ស្ដីពីពន្ធនាគារ នោះទេ ។
ក្រុមអ្នកច្បាប់នៅកម្ពុជាបានធ្វើការពន្យល់ថា ច្បាប់ស្ដីពីពន្ធនាគារមាន១១ជំពូក និង៨៥មាត្រា ដែលប្រកាសឱ្យប្រើដោយព្រះរាជក្រមលេខនស/រកម/១២១១/០២១ ចុះថ្ងៃទី២១ខែធ្នូឆ្នាំ២០១១ មិនបានចែងនិរាករណ៍ក្រឹត្យលេខ២៨ក្រ ចុះថ្ងៃទី២០ខែមិថុនាឆ្នាំ១៩៨៨ ស្ដីពីការលើកលែងទោស និងបន្ធូរបន្ថយទោសនោះនៅឡើយ (មិនទាន់មានលិខិតបទដ្ឋានគតិយុត្ដថ្មីមកជំនួស) ពោលគឺនៅមានសុពលភាពប្រើប្រាស់ជាធរមានដដែល ។
មជ្ឈដ្ឋានអ្នកច្បាប់ឯករាជ្យនៅកម្ពុជាបានធ្វើការវាយតម្លៃថា ព្រះរាជក្រឹត្យលើកលែងទោសឱ្យឯកឧត្ដម សម រង្ស៊ី កាលពីម្សិលមិញនេះ មានទម្រង់ខុសឆ្គង ឬរំលោភបំពានទៅលើសារាចរលេខ០៣សរ ចុះថ្ងៃទី២៩ខែឧសភាឆ្នាំ២០១៣ របស់រាជរដ្ឋាភិបាលកម្ពុជា ស្ដីពីការអនុវត្ដគោលការណ៍ណែនាំអំពីនីតិវិធី និងវិធាននៃការ តាក់តែងសេចក្ដីព្រាងច្បាប់ និងលិខិតបទដ្ឋានគតិយុត្ដផ្សេងទៀត។ នេះគឺជាគំរូអាក្រក់មួយនិងក៏បានបង្ហាញអំពីភាពស៊ីចង្វាក់គ្នាលើការតាក់តែងលិខិតបទដ្ឋានគតិយុត្ដនានានៅកម្ពុជា ៕
No comments:
Post a Comment