សេចក្តីថ្លែងការណ៍ ស្តីពី បរិយាកាសនយោបាយ ក្នុងអំឡុងពេល​ឃោសនា​រក​សំឡេង​ឆ្នោត​ អាណត្តិ​ទី​៥ ឆ្នាំ២០១៣

រាជធានីភ្នំពេញ, ថ្ងៃទី២៥ខែកក្កដា ឆ្នាំ២០១៣

ក្រុមអង្គការសង្គមស៊ីវិល ដែលបាន និងកំពុងតាមដាន​ការបោះឆ្នោតជាតិ អាណត្តិទី៥ បានកត់សំគាល់ថា ស្ថានភាពនយោបាយបានធូរស្រាលជាងមុនបន្ទាប់ពីព្រះមហាក្សត្រព្រះបាទ ព្រះនរោត្តម សីហមុនី ដែលបានលើក​លែង​​ទោស​​​ឯកឧត្តម សម​ រង្ស៊ី យោងតាមលិខិតស្នើសុំរបស់សម្តេចនាយករដ្ឋមន្ត្រី​ ដែលនេះគឺជាការរួមចំណែក​ក្នុងការ​ធានា ឲ្យមានភាព​ស្មើគ្នានៅក្នុងដំណើរការបោះឆ្នោត ដោយសេរី និងយុត្តិធម៌។ តែទោះជាយ៉ាងនេះក្តី អង្គការសង្គមស៊ីវិល នៅ​មានការព្រួយបារម្ភ ចំពោះភាពមិនប្រក្រតីមួយចំនួនដែលបានកើតមានឡើង នៅក្នុងយុទ្ធនា​ការ​ឃោសនារក សំលេង​ឆ្នោត ​អាណត្តិ​ទី​៥ ឆ្នាំ២០១៣នេះ។

 យោងតាមការសង្កេតការណ៍ដោយឯករាជ្យ​ និងអព្យាក្រិត្យ របស់ក្រុមអង្គការសង្គមស៊ីវិល អស់រយៈ​ពេល២៨ថ្ងៃ នៃយុទ្ធនាការឃោសនារកសំលេងឆ្នោត អាណត្តិទី៥ ចាប់តាំងពីថ្ងៃទី២៧ ខែមិថុនា ដល់ ថ្ងៃទី២៥ ខែកក្កដា ឆ្នាំ២០១៣ កន្លងទៅនេះ បានបង្ហាញឲ្យ​ឃើញថា មានបញ្ហាមួយចំនួនបានកើតមានឡើង ដូចជា អំពើហិង្សា ការចាប់ខ្លួន ការគំរាមកំហែងបំភិតបំភយ័ទៅលើអ្នកគាំទ្រគណបក្សប្រឆាំង ការរារាំង​មិនឲ្យចូលរួមដង្ហែក្បួនគណបក្ស ការប្រើប្រាស់ពាក្យសំដីថានឹងមានសង្គ្រាមរឺរដ្ឋប្រហារដោយកងយោ​​​ធពល​ខេមរ​ភូមិន្ទប្រសិន​បើ​គណបក្ស​ប្រឆាំង​ឈ្នះ​ឆ្នោត ការទិញទឹកចិត្តតាមរយៈការផ្តល់ថវិកានិងសម្ភារៈដើម្បីឲ្យមានការចូលរួម​ឃោសនា ការជេរ​ប្រមាថ និងឌឺដង​ពាក្យសំដីដាក់គ្នាធ្ងន់ៗ ការ​បំផ្លាញ​ស្លាក​គណបក្ស ការប្រើប្រាស់ប្រព័ន្ធផ្សព្វ​ផ្សាយមិនស្មើភាពគ្នា ការមិនទាន់ផ្តល់​សិទ្ធិ​​ឲ្យ​លោក សម​ រង្ស៊ី បោះឆ្នោត​ និងឈរឈ្មោះបោះឆ្នោតដូចជាមេបក្សដ៏ទៃទៀត ជាដើម​។ល។ ក្រុមអង្គការសង្គម​ស៊ីវិលសូមបង្ហាញនូវឧប្បត្តិវហេតុជាក់ស្តែង​មួយចំនួន​ ដូចខាងក្រោមៈ

1.    អំពើហិង្សា បណ្តាលឲ្យយុវជនគណបក្សសង្រ្គោះជាតិ លោក ហែម វុត្ថា រងរបួសបែកក្បាល​ នៅម្តុំចាក់​អង្រែ រាជធានីភ្នំពេញ កាលពីថ្ងៃទី២៤ ខែកក្ដដា ឆ្នាំ២០១៣។

2.    ការកោះហៅ លោក មិក ជា ជាជំទប់ទី១ គណបក្សសង្រ្គោះជាតិ នៅឃុំគគីរធំ ស្រុកលើកដែក ខេត្តកណ្តាល កាលពីថ្ងៃទី២៤ ខែកក្កដា ឆ្នាំ២០១៣។

3.    ការឃាត់ខ្លូន លោក យាន យុទ្ធី គណបក្សសង្រ្គោះជាតិ នៅឃុំគគីរធំ ស្រុកលើកដែក ខេត្តកណ្តាល កាលពី​​ថ្ងៃទី​២៣ ខែកក្កដា ឆ្នាំ២០១៣​។

4.    ការឃាត់ខ្លួនជំទប់ឃុំទី១ និងទី២ របស់គណបក្សសង្រ្គោះជាតិ នៅឃុំកញ្ជ្រាច ស្រុកកញ្ជ្រាច ខេត្តព្រៃវែង កាលពីថ្ងៃ​ទី១៨ ខែកក្កដា ឆ្នាំ២០១៣។

5.    ការកោះហៅដោយប៉ូលីស លើសកម្មជនគណបក្សសង្រ្គោះជាតិ ចំនួន ៣ ​នាក់ ក្នុងនោះម្នាក់ជាជំទប់ទី ២​នៅឃុំកំពង់ពពិល ស្រុកពារាំង ខេត្តព្រៃវែង កាលពីថ្ងៃទី២២ ខែកក្កដា ឆ្នាំ២០១៣។

6.    ការឃាត់ខ្លូន លោក តូច ឡេង ជំទប់ទី១ គណបក្សសង្រ្គោះជាតិ នៅឃុំក្រាំងយ៉ូវ ស្រុកស្អាង ខេត្តកណ្តាល កាលពី​ថ្ងៃទី២២ ខែកក្កដា ឆ្នាំ២០១៣​។

7.    ការបំផ្លាញស្លាក​សញ្ញាគណបក្សសង្រ្គោះជាតិ ស្ថិតនៅផ្លូវជាតិលេខ៦ ម្តុំរង្វង់មូលព្រលានយន្តហោះ​ខេត្ត​សៀម​រាប កាលពីថ្ងៃទី២២ ខែ​កក្កដា ឆ្នាំ​២០១៣។

8.    អំពើហិង្សាទៅលើ លោក សាម​ សុខា និងលោក ភុន ចាន់ណារ៉ា សកម្មជនគណបក្សសង្គ្រោះជាតិ នៅគល់ ស្ពានតាខ្មៅ សង្កាត់ដើមមាន ក្រុងតាខ្មៅ កាលពី​ថ្ងៃទី២១ ខែកក្កដា ឆ្នាំ២០១៣​។

9.    ការបាញ់ចូល​ទីស្នាក់ការ​កណ្ដាល​របស់​គណបក្សសង្រ្គោះជាតិ នៅ​ខណ្ឌ​ទួលគោក រាជធានី​ភ្នំពេញ កាលពី​ថ្ងៃ​ទី២០ ខែ​កក្កដា ឆ្នាំ​២០១៣។

10.  ការដុត​លំនៅឋាន​របស់​សកម្មជន​គណបក្សសង្រ្គោះជាតិ លោក ឆួរ ចិន ដោយ​ជន​មិន​ស្គាល់​មុខ​ ​ កាលពី​ថ្ងៃ​ទី១៩ ខែ​កក្កដា ឆ្នាំ​២០១៣ នៅ ឃុំ​ជប់វារី ស្រុក​ព្រះនេត្រព្រះ ខេត្ត​បន្ទាយមានជ័យ។

11.  អំពើហិង្សា ដោយគប់ដុំថ្ម​ដាក់​ដាក់​អ្នកគាំទ្រ​គណបក្សសង្រ្គោះជាតិ កាលពីល្ងាចថ្ងៃទី១៩ ខែកក្កដា ឆ្នាំ ២០១៣ នៅវត្តភ្នំ រាជធានីភ្នំពេញ។

12.  អំពើហិង្សា នៅឃុំព្រែកតាទែន ស្រុកពញាព្ញ ខេត្តកណ្តាល​ កាលពីទី១៧ ខែកក្កដា ឆ្នាំ២០១៣​ បានបណ្តាល ឲ្យរបួសក្បាលសកម្មជនគណបក្សប្រជាជនម្នាក់​ និងមានការចាប់ខ្លូន លោក ប៊ុត សាខន សមាជិកគណបក្ស​សង្រ្គោះជាតិ យកទៅឃុំរហូតដល់បច្ចុប្បន្ន។

13.  អំពើហិង្សា នៅជិតស្ពានព្រះមុន្នីវង្សថ្មី រាជធានីភ្នំពេញ ដែលបណ្តាលអោយប្រជាពលរដ្ឋខ្មែរម្នាក់​រងរបួស​បែកក្បាល កាលពីថ្ងៃទី២១ ខែកក្កដា ឆ្នាំ២០១៣។

14.  អំពើហិង្សា​ ដោយការគប់ដំថ្ម លើក្បួន​ដង្ហែរបស់​គណបក្សសង្រ្គោះជាតិ នៅ​សង្កាត់​ផ្សារ​ដើមថ្កូវ​ ខណ្ឌ​ចំការ​មន រាជធានីភ្នំពេញ បណ្តាលឲ្យរងរបួស ៣ នាក់ កាលពីយប់ថ្ងៃទី៥ ខែកក្កដា ឆ្នាំ២០១៣។

ដើម្បីឲ្យការ​បោះឆ្នោត​ជ្រើស​តាំង​តំណាងរាស្ត្រ​អាណត្តិទី៥ នាពេលខាងមុខនេះប្រព្រឹត្តទៅ​ប្រកប​ដោយសេរី​និងយុត្តិធម៌ ​អង្គការ​សង្គមស៊ីវិល​ សូមអំពាវនាវដល់រាជរដ្ឋាភិបាល អាជ្ញាធរ និងកងកំលាំងប្រដាប់អាវុធ មេត្តា រក្សា​នូវតួនាទី​អព្យាក្រឹត្យ ដើម្បីការពារ និងធានាបរិយាកាសបោះឆ្នោត​ និងក្រោយពេលបោះឆ្នោត ដោយគ្មានការភ័យខ្លាច និងសូមកងកំលាំងប្រដាប់អាវុធបញ្ជាក់ជំហររបស់ខ្លួនថា​ ​នឹងមិនមានរដ្ឋប្រហារទេ ប្រសិនបើគណបក្សប្រឆាំង​ឈ្នះ​ឆ្នោត។ ក្រុមអង្គការសង្គមស៊ីវិលសូម​អំពាវ​នាវផងដែរដល់បងប្អូនប្រជាពលរដ្ឋទាំងអស់​​ដែលមានសិទ្ធិបោះ​ឆ្នោតសូម​អញ្ជើញ​ទៅ​បោះឆ្នោត​តាមឆន្ទៈ​រៀងៗខ្លួន និងសូមសកម្មជនគ្រប់គណបក្សទាំងអស់ មេត្តារក្សានូវសីលធម៌ និង​គុណធម៌ ជៀស​វាងការប្រើហិង្សា។

ព័ត៌មានបន្ថែមសូមទាក់ទងៈ

·       លោក សុក សំអឿន   ប្រធានសំរបសំរួល គណៈកម្មាធិការប្រព្រឹត្តិកម្ម (CHRAC)

                                 និងជានាយកប្រតិបត្តិ ក្រុមអ្នកច្បាប់ការពារសិទ្ធិកម្ពុជា (CDP)                         Tel: 012 901 199

·       លោក នី ចរិយា         ប្រធានផ្នែកស៊ើបបអង្កេត សមាគមអាដហុក (ADHOC)                                Tel:011 274 959

·       លោក ហង្ស ពុទ្ធា       នាយកប្រតិបត្តិ និកហ្វិច(NICFEC)                                                      Tel: 012 959 666

·       កញ្ញា គង់ រ៉ាវីន          អ្នកសម្របសម្រួលផ្នែកអង្កេត ខុមហ្វ្រែល (COMFREL)                               Tel: 012 654 950

·       លោក ម៉ាក ចំរើន​       ប្រធានសមាគម យុវជនខែ្មរ (KYA)                                                       Tel: 097 444 577 7

·       លោក សួន ប៊ុនស័ក្តិ    លេខាធិការប្រតិបត្តិ CHRAC                                                             Tel: 092 344 357