ករណីគ្រោះថ្នាក់ចរាចរណ៍ដ៏សែនរន្ធត់មួយ កើតឡើងកាលពីថ្ងៃទី២០ខែកក្កដាឆ្នាំ២០១៣វេលា ម៉ោង១៧និង៣៤នាទីល្ងាច នៅចំណុចភូមិជ្រោយអំពិល សង្កាត់ក្បាលកោះ ខណ្ឌមានជ័យ រាជធានីភ្នំពេញ បង្កដោយបុរសវ័យ ក្មេងម្នាក់ឈ្មោះ ប៊ុន រតនៈ អាយុ៣១ឆ្នាំ បើកបររថយន្ដទំនើប១គ្រឿងម៉ាក Range Rover ពណ៌ខ្មៅ ពាក់ស្លាកលេខភ្នំពេញ 2AA-6777 ឌុបសង្សារទាំងអាការៈស្រវឹង បុកម៉ូតូ១គ្រឿងម៉ាកឌ្រីម១២៥ ពណ៌ខ្មៅ ពាក់ស្លាកលេខ ភ្នំពេញ 1BQ-4083 ចំពីមុខពេញទំហឹង បណ្ដាលឱ្យមនុស្សស្រីចំនួន៣នាក់ជិះនៅលើម៉ូតូស្លាប់ភ្លាមៗមួយរំពេច ដោយសាកសពខ្ទាតពាសពេញផ្លូវនោះ ត្រូវបានគេបិទបញ្ចប់សំណុំរឿងហើយ ត្រឹមធ្វើការចរចាសម្រុះសម្រួលគ្នា ដោយជនបង្កបង់លុយឱ្យក្រុមគ្រួសារជនរងគ្រោះ បន្ទាប់ពីសមត្ថកិច្ចនគរបាលខណ្ឌមានជ័យឃាត់ខ្លួនជនបង្កឈ្មោះ ប៊ុន រតនៈ បានមួយដង្ហើមចង្រិតប៉ុណ្ណោះ (សូមចូលអានគេហទំព័រសារព័ត៌មានដើមត្នោតចុះផ្សាយថ្ងៃទី២០ ខែកក្កដាឆ្នាំ២០១៣បន្ថែម) ។
កិច្ចចរចាសម្រុះសម្រួលក្នុងករណីគ្រោះថ្នាក់ចរាចរណ៍ដ៏សែនរន្ធត់មួយនេះ អាចប្រព្រឹត្ដទៅបាននៅត្រឹមកម្រិតការិយាល័យនគរបាលចរាចរណ៍ផ្លូវគោក ដោយសារជនបង្កឈ្មោះ ប៊ុន រតនៈ គឺជាកូនប្រុសរបស់ឈ្មោះ ប៊ុន សេរី ដែលគេស្គាល់ថា ជាមន្ដ្រីកាន់លុយដុះស្លែនៅសាលារាជធានីភ្នំពេញ (ប្រធានគណនេយ្យហិរញ្ញវត្ថុ) ហើយមន្ដ្រីរូបនេះបានប្រើប្រាស់ទឹកលុយជះទៅលើក្រុមគ្រួសារសព និងសមត្ថកិច្ចនគរបាលយុត្ដិធម៌ កុំឱ្យមានការប្ដឹងផ្ដល់ និង បញ្ជូនសំណុំរឿងទៅតុលាការជាសមត្ថកិច្ច ខ្លាចក្រែងកូនប្រុសជាទីស្រឡាញ់របស់ខ្លួនឈ្មោះ ប៊ុន រតនៈ ទទួលរងការផ្ដន្ទាទោសឱ្យជាប់គុកច្រវាក់ ។
អនុលោមតាមមាត្រា៨២នៃច្បាប់ស្ដីពីចរាចរណ៍ផ្លូវគោកនៃព្រះរាជាណាចក្រកម្ពុជា បានចែងថា “ជនណាបើកបរដោយបង្កឱ្យស្លាប់ដល់អ្នកដទៃដោយអចេតនា ត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ…ត្រូវផ្ដន្ទាទោសដល់កម្រិតអតិបរមា ក្នុងករណីជនបង្កឋិតក្នុងស្ថានភាពស្រវឹង, រត់គេចខ្លួនពីកន្លែងកើតហេតុ ក្នុងគោលបំណងគេចវេះពីការទទួលខុសត្រូវ…” ។
មជ្ឈដ្ឋានអ្នកច្បាប់និងអ្នកវិភាគកិច្ចការសង្គមនៅកម្ពុជា បានធ្វើការបញ្ជាក់ថា ជនបង្កក្នុងករណីគ្រោះថ្នាក់ចរាចរណ៍នេះ បណ្ដាលឱ្យមនុស្សស្លាប់ដល់ទៅ៣នាក់ ជនបង្កឋិតក្នុងស្ថានភាពស្រវឹង និងជនបង្កមានបំណងបើករថយន្ដគេចខ្លួនថែមទៀត(បើកឡានរត់ចម្ងាយប្រហែល២០០ម៉ែត្រទើបបែកកង់ទៅមុខលែងរួច) ដូច្នេះ ជនបង្កត្រូវតែទទួលទោសជាអតិបរមា មិនត្រូវបញ្ចប់ទាំងសោះកក្រោះ តាមវិធីបង់លុយឱ្យក្រុមគ្រួសារជនរងគ្រោះនោះទេ ។ បើចេះតែសម្រួលគ្នាងាយស្រួលនៅក្រៅប្រព័ន្ធតុលាការដូច្នេះ គឺវានឹងក្លាយទៅជាគំរូអាក្រក់សម្រាប់ អ្នកមានអំណាច អ្នកមានលុយ អាចបើករថយន្ដបុកគេហើយមិនទទួលទោស ដោយយ៉ាងខ្លាំងចប់ត្រឹមបង់លុយជាការស្រេច ។
ឥឡូវ ករណីគ្រោះថ្នាក់ចរាចរណ៍ដ៏សែនរន្ធត់នេះ ត្រូវបានបិទបញ្ចប់សំណុំរឿងហើយ ត្រឹមគ្រួសារជនបង្កជាអ្នកមានលុយមានអំណាចបង់លុយឱ្យទៅក្រុមគ្រួសារជនរងគ្រោះ ដោយមិនទទួលទោសទណ្ឌតាមការផ្ដន្ទា ទោសរបស់តុលាការអ្វីឡើយ ។
នេះគឺជារូបភាពរឿងរ៉ាវដ៏មហាអយុត្ដិធម៌ និងក៏បានឆ្លុះបញ្ចាំងឱ្យឃើញអំពីវប្បធម៌និរទណ្ឌភាពនៅកម្ពុជា ដែលកើតឡើងដោយអំពើរបស់អ្នកមានអំណាច និងអ្នកមានលុយនៅក្នុងសម័យរាជាណាចក្រកម្ពុជាទី២ ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី ៕
No comments:
Post a Comment