ដីកាចាប់ខ្លួនរបស់តុលាការគ្មានប្រសិទ្ធភាពទៅលើអ្នកមានអំណាច និងអ្នកមានលុយ
មានមនុស្សមួយចំនួនដែលពាក់ព័ន្ធទៅនឹងសំណុំរឿងក្តីព្រហ្មទណ្ឌត្រូវបានស្ថាប័នតុលាការចេញដីកាចាប់ខ្លួននៅមុនពេលជំនុំជម្រះក៏មាន និងនៅក្រោយពេលសវនាការជំនុំជម្រះក៏មាន។
ជនដែលមានឈ្មោះនៅក្នុងបញ្ជីស្វែងរកចាប់ខ្លួនរបស់តុលាការរួមមានត្រួសៗដូចតទៅ៖
១-កញ្ញា ជា រដ្ឋា អតីតជានាយអាវុធហត្ថ និងនគរបាលជាតិ ត្រូវបានតុលាការចេញដីកាចាប់ខ្លួន ព្រោះពាក់ព័ន្ធនឹងរឿងជះទឹកអាស៊ីដទៅលើម្តាយមីងរបស់ កញ្ញា អ៊ិន សុខលីនដា។ កាលនៅមានអំណាចមុខពេលតុលាការចេញដីកាចាប់ខ្លួនកញ្ញាជា រដ្ឋា អាចអញ្ជើញប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃព្រះរាជាណាចក្រកម្ពុជា គឺសម្តេចអគ្គមហាធម្មពោធិសាល ជា ស៊ីម ឲ្យចូលរួមធ្វើជាអធិបតីសម្ពោធយានដ្ឋានរបស់ខ្លួនបានយ៉ាងហ៊ឺហា។
២-លោក ម៉ី រដ្ឋា អតីតទីប្រឹក្សាសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានៃព្រះរាជាណាចក្រកម្ពុជា មានឋានៈស្មើអនុរដ្ឋលេខាធិការត្រូវបានតុលាការចេញដីកាចាប់ខ្លួនកាលពីថ្ងៃទី ២៤ ខែតុលា ឆ្នាំ២០១១ ក្រោមការចោទប្រកាន់ពីបទ រំលោភលើទំនុកចិត្ត។ លោក ម៉ី រដ្ឋា ដែលក្លាយជាជនជាប់ចោទនៅស្ថាប័នតុលាការត្រូវជាស្វាមីរបស់ឈ្មោះឌី លីនណា នៅមុនពេលតុលាការចេញដីកាចាប់ខ្លួនគឺមានជំនាញខាងចេញមូលប្បទានបត្រ «សែក» អត់លុយ។
៣-លោក យាន ស៊ីណា អតីត អនុរដ្ឋលេខាធិការក្រសួងយុត្តិធម៌ត្រូវបានតុលការចេញដីកាចាប់ខ្លួន ព្រោះមានការពាក់ព័ន្ធទៅនឹងសំណុំរឿងប្រើអំពើហិង្សាទៅលើក្រុមអ្នកសារព័ត៌មាន។ លោក យាន ស៊ីណា ដែលមានឈ្មោះជាជនជាប់ចោទត្រូវបានសាលាដំបូងរាជធានីភ្នំពេញប្រកាសសាលក្រមកាលពីថ្ងៃទី ២៧ ខែមិថុនា ឆ្នាំ២០១៣ សម្រេចផ្តន្ទាទោសដាក់ពន្ធនាគារចំនួន ២ ឆ្នាំ គិតពីថ្ងៃចាប់ខ្លួន និងពិន័យជាប្រាក់ចំនួន ៤ លានរៀល។
៤-លោក ឈូក បណ្ឌិត អតីតអភិបាលក្រុងបាវិត ខេត្តស្វាយរៀង ត្រូវបានតុលាការសាលាដំបូងខេត្តស្វាយរៀង ចេញដីកាចាប់ខ្លួនព្រោះមានការពាក់ព័ន្ធនឹងសំណុំរឿងក្តីបាញ់កម្មការិនីចំនួន ៣ នាក់ ឲ្យរងរបួសធ្ងន់ធ្ងរ។ លោកឈូក បណ្ឌិត ត្រូវបានតុលាការផ្តន្ទាទោសដាក់ពន្ធនាគារចំនួន ១៨ ខែ ពីបទប្រព្រឹត្តអំពើហិង្សាដោយអចេតនា។ តាមប្រភពព័ត៌មានខ្លះ បានឲ្យដឹងថា លោកឈូក បណ្ឌិត ដោយសារមានលុយកាក់ច្រើនត្រូវបានអ្នកធំតាមជួយការពារមិនឲ្យជនជាប់ចោទរូបនេះស្គាល់រសជាតិគុកឡើយ។
៥-លោកស្រីឧកញ៉ា ឈិន សុគន្ធារី ហៅយាយក្រពើ ត្រូវបានតុលាការសាលាដំបូងរាជធានីភ្នំពេញ ចេញដីកាចាប់ខ្លួនកាលពីថ្ងៃទី ២០ ខែធ្នូ ឆ្នាំ២០១២ ក្រោមទម្ងន់នៃបណ្តឹងចោទប្រកាន់ពីសំណាក់អាជ្ញាធរសាលារាជធានីភ្នំពេញ ដែលមានឯកឧត្តម កែប ជុតិមា អតីតអភិបាលនៃគណៈអភិបាលរាជធានីភ្នំពេញ។ យាយក្រពើដែលសព្វថ្ងៃកំពុងសម្ងំលាក់ខ្លួនពួនអាត្មានោះត្រូវបានតុលាការសម្រេចផ្តន្ទាទោសដាក់ពន្ធនាគារចំនួន ៤ ឆ្នាំ ០៦ ខែ ពីបទប៉ះពាល់កម្មសិទ្ធិនៃទ្រព្យសម្បត្តិសាធារណៈ។
បច្ចុប្បន្នដីកាបង្គាប់ឲ្យចាប់ខ្លួនជនជាប់ចោទទាំង ៥ នាក់ ដូចបានរៀបរាប់ខាងលើរបស់ស្ថាប័នតុលាការគឺបានត្រឹមឋិតនៅលើក្រដាសតែប៉ុណ្ណោះ ឬអាចនិយាយថា «ចាប់ខ្យល់» ពីព្រោះជនជាប់ចោទខ្លះបានពួនសម្ងំលាក់ខ្លួននៅផ្ទះអ្នកធំ អ្នកមានអំណាច និងជនជាប់ចោទខ្លះទៀតបានរត់គេចខ្លួនទៅបរទេសឋិតនៅក្បែរខាងប្រទេសកម្ពុជា ដោយខ្លាចជាប់ពន្ធនាគារ។
មជ្ឈដ្ឋានអ្នកច្បាប់ឯករាជ្យបានលើកឡើងថា គេមិនដឹងថា ដីកាចាប់ខ្លួនចេញដោយស្ថាប័នតុលាការនោះមានយុត្តិធម៌ ឬអយុត្តិធម៌សម្រាប់ជនជាប់ចោទទេ ប៉ុន្តែតាមគោលការច្បាប់ដីកាបង្គាប់ឲ្យចាប់ខ្លួនចេញដោយតុលាការគឺបង្គាប់ឲ្យសមត្ថកិច្ចនគរបាលយុត្តិធម៌ (ជានគរបាលជាតិ ឬជាកងរាជអាវុធហត្ថ…) ចូលរួមអនុវត្តន៍ក្នុងការតាមស្វែងរកចាប់ខ្លួនជនជាប់ចោទ ឬទណ្ឌិត។ ប្រសិនបើដីកាចាប់ខ្លួនរបស់តុលាការចេញមកក្លាយជាឥតប្រយោជន៍ ឬបានត្រឹម «ចាប់ខ្យល់» នៅគ្រប់ករណី (ចាប់ខ្លួនជនជាប់ចោទមិនបានអស់រយៈពេលរាប់ឆ្នាំ) នាំឲ្យដីការបស់ស្ថាប័នតុលាការគ្មាប្រសិទ្ធភាព និងធ្វើឲ្យបាត់បង់តម្លៃនៃផលប្រយោជន័ច្បាប់ ព្រមទាំងប៉ះពាល់ដល់កិត្យានុភាពនៃស្ថាប័នតុលាការទាំងមូល។
ក្រុមអ្នករិះគន់បានលើកឡើងថា រវាងមន្ត្រីតុលាការ និងមន្ត្រីនគរបាលយុត្តិធម៌កម្ពុជា នៅក្នុងសម័យ «សម្តេចតេជោសែន» គឺមួយដំប និងបួន គិតតែផលប្រយោជន៍លុយកាក់ និងបុណ្យស័ក្តិផ្ទាល់ខ្លួនដូចគ្នា គ្មានខ្វល់នឹងការអនុវត្តន៍ច្បាប់ និងផ្តល់យុត្តិធម៌ឲ្យប្រជាពលរដ្ឋជាម្ចាស់ឆ្នោត និងជាម្ចាស់វាសនាប្រទេសជាតិអ្វីឡើយ៕
No comments:
Post a Comment