សេច​ក្តីថ្លែងការណ៍ លោក គុជ វែង ជាសកម្មជនការ​ពារ​សិទ្ធិមនុស្ស និងធនធានធម្មជាតិ​ប្រចាំខេត្តពោធិសាត់​គួរត្រូវបាននៅក្រៅឃុំបណ្តោះអាសន្ន

គណៈកម្មាធិការ​ប្រព្រឹត្តិ​កម្ម នៃ អង្គការ-សមាគម​ការពារ​សិ​ទិ្ធ​មនុស្ស​កម្ពុជា (CHRAC) ជា​សម្ព័ន្ធ​នៃ​អង្គការ​មិនមែន​រដ្ឋាភិបាល ដែលមាន​សមាជិក ​ចំនួន ២១ សូម​សំដែង​នូវ​ការព្រួយបារម្ភយ៉ាងខ្លាំង​ចំពោះការ​ឃុំខ្លួនដោយមិនមានភស្តុតាងគ្រប់គ្រាន់​លើលោក លោក គុជ វែង ជាសកម្មជនការ​ពារ​សិទ្ធិមនុស្ស និងធនធាន​ធម្មជាតិ​ ប្រចាំខេត្តពោធិសាត់​អស់រយៈ​ពេលជាងពីរខែកន្លងទៅនេះ។

លោក ​គុជ វែង ត្រូវបានប៉ូលីសចាប់ខ្លួនកាលពីថ្ងៃទី១៩ ខែឧសភា​ ឆ្នាំ២០១៣ ខណៈដែលលោកទៅ​ចំ​ការនៅចំណុចភ្នំព្រះ ភូមិក្បាលត្រាច ឃុំក្បាល​ត្រាច ស្រុកក្រគ ខេត្ត​ពោធិ៍​សាត់​ ហើយបញ្ជូនខ្លួនគាត់ទៅ ដាក់ឃុំរហូតមក​ដល់ថ្ងៃនេះ ដោយ​ចោទ​ប្រកាន់​គាត់​ពី​បទ ​ឆបោក ដែលបានប្រព្រឹត្តកាលពីថ្ងៃទី១៥ ខែវិឆ្ឆិកា ឆ្នាំ២០១០ នៅភូមិខ្សាច់ល្អិត ឃុំក្បាលត្រាច ស្រុកក្រគរ ខេត្តពោធិសាត់។ 

យោងតាមការប្រមូលពត៌មានរបស់គណៈកម្មាធិការប្រព្រឹត្តិកម្ម​ បានរកឃើញថា ការចាប់ខ្លួនលោក គុជ វែង គឺពាក់ព័ន្ធនឹងការចោទប្រកាន់ពីលោកស្រី អ៊ំ ធាវី ដែលបានព្រមព្រៀងគ្នាប៉ុនប៉ងយកលុយទៅសូកប៉ាន់ ដើម្បីប្តីគាត់ (អ៊ំ ធាវី) បានទទួលការងារបុណ្យសក្កិជាប៉ូលីស។ បន្ទាប់ពីបានព្រមព្រៀង លោកស្រីបានអះអាង​បញ្ជាក់ថា លោក គុជ វែង បានឆបោកលុយគាត់ចំនួន ៤៥០០ ដុល្លាអាមេរិក។ អង្គហេតុនេះ បានបញ្ជាក់យ៉ាង​ច្បាស់​នៅក្នុងពាក្យបណ្តឹងកាលពីថ្ងៃទី២២ ខែកុម្ភៈ ឆ្នាំ២០១២ ប៉ុន្តែវាគួរឲ្យសោកស្តាយចំពោះការចោទប្រកាន់​របស់តំណាងអយ្យការអមតុលាការខេត្តពោធិសាត់ទៅលើភាគីម្ខាងនៃកិច្ចព្រមព្រៀងប្រព្រឹត្តបទសូកប៉ាន់។ ភាព​សមហេតុផលតាមផ្លូវច្បាប់ បើតំណាងអយ្យការដំណើរការចោទប្រកាន់លោក គុជ វែង​​ ក៏គួរចោទប្រកាន់អ្នកស្រី ជាភាគីដើមចោទផង​ដែរ។

គណៈកម្មាធិការប្រព្រឹត្តិកម្ម​ចាត់ទុកការចាប់ខ្លួនលោក គុជ វែង គឺជាការ​រំលោភ​សិទ្ធិមនុស្ស និងជាការ​គំរាមកំហែងដល់សកម្មជនការពារសិទ្ធិមនុស្ស និងធនធានធម្មជាតិដទៃទៀត កុំឲ្យមានការតវ៉ាទាមទារ។ ហើយ បច្ចុប្បន្ន លោក គុជ វែង កំពុងមានជំងឺប្រចាំកាយធ្ងន់ធ្ងរដែលតំរូវឲ្យមានការពិនិត្យ និងព្យាបាលជាប្រចាំពីគ្រូ​ពេទ្យ​ ដូច្នេះ គណៈកម្មាធិការប្រព្រឹត្តិកម្ម​មានជំនឿថា សាលាឧទ្ធរណ៍ ដែលគ្រោងនឹងបើកសាវនាការ​លើការ​សុំ​នៅក្រៅឃុំបណ្តោះអាសន្ន នៅថ្ងៃទី២៣ ខែកក្កដា ឆ្នាំ២០១៣ ស្អែកនេះ នឹងធ្វើការពិចារណា​ដោះលែង​លោក គុជ វែង ឲ្យនៅក្រៅឃុំបណ្តោះអាសន្នដើម្បីបានព្យាបាលជំងឺ និងរកស៊ីចិញ្ចឹមគ្រួសារ ព្រោះលោកមាន​កូនរហូត ដល់ទៅ ៧ នាក់ក្នុងបន្ទុក។

   ភ្នំពេញ, ថ្ងៃ​ទី​២២ ខែកក្កដា ឆ្នាំ​២០១៣

សម្រាប់​ព័ត៌មាន​បន្ថែម សូម​ទាក់ទង៖

លោក សុក សំអឿន           នាយក​ប្រតិបត្តិ​នៃ​អង្គការ CDP                                  ទូរស័ព្ទលេខ: ០១២ ៩០១ ១៩៩

លោក ឡាត់ គី                 ប្រធាន​ផ្នែក​ដីធ្លី និងធនធានធម្មជាតិ ​សមាគម​អាដហុក     ទូរស័ព្ទលេខ: ០១២ ៨២៨ ៤១១

លោក ម៉ាក ចំរើន​              ប្រធានសមាគម KYA                                             ទូរស័ព្ទលេខ: ០៩៧៤៤៤៥៧៧៧

លោក សួន ប៊ុន​ស័ក្តិ           លេខាធិការ​ប្រតិបត្តិ CHRAC                                    ទូរស័ព្ទលេខ: ០៩២ ៣៤៤ ៣៥៧